கண்கள் ஊடே!!!!

பாசத்தின் உணர்வுகளைக் கண்டு கொள்ளும் இன்னொரு இடம் விமானநிலையம்! நான் பலதரப்பட்ட பயணமாக சென்னை செல்லும் போதெல்லாம் விமானநிலையத்திற்கு கொஞ்சம் அதிக நேரம் முன்னதாகவே வந்து விடுவது உண்டு;

காரணம், பயணங்கள் எளிதாக இருக்கனும் என்ற எண்ணத்தில்.. அப்போது பலர் தம் மேற்படிப்பு,வேலை,மருத்துவம் என பலகாரணங்களுக்காக வெளி இடங்களுக்கு பயணிப்பதற்கு தயாராக வருவார்கள் .

'பாப்பாவை ஜாக்கிரதையாக பார்த்துக்கம்மா' பேத்தி மீதான பாட்டியின் பாசம் ஒரு புறம் என்றால், 'அதெல்லாம் நான் பார்த்துக்கின்றேன்' என்று  தன் மகள் மீது தனக்கும் பாசம் உண்டு என்று காட்டும், முதல் குழந்தை பெற்ற பின் நாடு கடந்து செல்லும் மகளின் தாயுணர்வு ஒரு பக்கம்!

'எல்லா தஸ்தாவேஸ்கள் பத்திரமாக எடுத்துவிட்டாயாம்மா'.

'ஓம் அப்பா! இன்னும் நான் என்ன சின்னப்பிள்ளையா!' சினந்து கொள்ளும் மகள், மணம்முடித்து வெளிநாடு போக உள்நுழைவாள்! 'நீ எத்தனை பிள்ளை பெற்றாலும் எனக்கு குழந்தைதான்' பாசத்தில் கம்பீரமாக வலம் வந்த அப்பா குழந்தையாக மாறுவது விமானநிலையத்தில்!

'கவனமாக படிக்கனும்' அக்காள் அடுத்த தாயாக மாறி தங்கைக்கு அறிவுரை சொல்லும் இடம் இங்குதான்! 'அம்மாவை பாத்துக்க, அடிக்கடி கோல் பண்ணு,
வீட்டில் இரு, விளையாடப்போய் விடாத! இனி நீ தான் வீட்டுக்கு காவலன்' என்று இடித்துரைத்து தம்பிக்கு குடும்பப் பொறுப்பைச் சுட்டிக்காட்டும் அக்காள் விடைபெறும் இடம் பன்னாட்டு பறக்கும் இடத்தில்!

'அடிக்கடி கோல் பண்ணுங்க மாப்பிள்ளை' மச்சானை மச்சான் அண்ணாவாக பார்க்கும் இடம்!

'இரண்டு வருடம் தானே கொஞ்சம் உழைத்துவிட்டு வாறன்!' கவலையுடன் வழியணுப்பும் தாய்க்கு கலங்கிய விழியுடன் அரபுலகம் செல்ல விடைபெறும் மகன். சனிக்கிழமையில் நல்லா முழுகு எண்ணைய் வைத்து; மருத்துவச்சியாகும் தாயுள்ளம் மகளுக்கு சொல்லியணுப்பும் இடம்!

'மகளைப்பத்திரமாக பார்த்துக்கங்க! இவ்வளவுகாலமும் செல்லமாக வளர்த்துப்போட்டன், ஏதும் பிழை செய்திட்டா கோபப்பட்டு திட்டிவிடாதீங்க மாப்பிள்ளை' மாமானார் மருமகனிடம் பேசும் போதே தொண்டை அடைத்துக்கொள்ளும்; தன் மகள் வெளிநாட்டில் போய் எப்படி தனிக்குடித்தனம் நடத்தப்போறாளோ என்ற கவலையோடு வழியணுப்பும் இடத்தில்...

சரி அக்காள் நான் போய்ட்டு வாறன்;ஒன்றுக்கு ஜோசிக்காத! அடிக்கடி எதிலும் அவசரப்படாத போற இடத்தில் என்று முன் எச்சரிக்கை செய்வதில் அக்காள் இன்னொரு வழிகாட்டியாகுவாள்; அதுவரை உடுப்பு மடித்துவைக்க சண்டைபிடித்த நினைவுகள் வந்து போகும்! கூடவே  இருவருக்கும் நல்ல தோழியின் பிரிவை ஞாபகப் படுத்தும் விமானநிலையம்!

இதையும் தாண்டி மறுகரையில் பலர் 'மாப்பிள டுபாய் போனதும் கோல் பண்ணு, நம்ம பங்காளி எல்லாம் பார்த்துக்கொள்வார்' என்று பாசமாக அன்பு பொழியும் இன்னொரு உறவு.

'ஏப்பா தம்பி, நீங்க சிங்கை வழியாலயா போறீங்க? '

'ஆமா பாட்டி..'

'சும்மா இரு பாட்டி! யார் என்றே தெரியாதவரிடம்...'

'தம்பியைப்பார்த்தா நல்லவர் போல இருக்கின்றார். தம்பி இவ என் பேத்தி! பேரன்ஏதோவேலை அதிகம் என்பதால கூட்ட வரவில்லை! நீங்க கொஞ்சம் உதவி செய்து சிங்கையில் இறங்கும் வரை தஸ்தாவேஸ்க்கு(document) உதவி செய்தம்பி!'  என்று  உரிமையுடன்,  அனுபவமே ஆட்களை இனம் காட்டும் என்று, பேர்த்தியின் பட்டப்படிப்பை விட கிராமத்து மனதில் முதுகலை கற்ற பாட்டி.

'சரிம்மா வாங்கோ!'
எப்படி எல்லாம் அண்ணன் தங்கை உறவாக திடீர் வரவுகள் காணும் இடம் விமானநிலையப் பயணம்.

'ஏங்க நீங்க ஐரோப்பாவில் இருந்து வந்தீங்களா?' குறுக்கு விசாரனையில் இன்னொரு சட்டதரணி என்று நினைப்பில் வரும் முகம் தெரியாத நண்பர்!

'நான் இங்க சுற்றுலா மையம் நடத்துகின்றன். பல இடங்கள் பார்க்க வேண்டிய வசதிகள் செய்வம்' என்று விளம்பர முகவரி கொடுக்கும் போதே இன்னொரு உறவாகிவிடும் சுற்றுலா பயணிகளுக்கு.

ஐரோப்பாவில் எந்த இடம்? என்று கேட்கும் அடுத்த நண்பனாக வருவான் ஈழத்தில் பிறந்த இன்னொரு சகபயணாளி!

'நான் இந்த தேசம்..'

'ஓ அப்படியா! ஊரில் எந்த இடம்?' பதில்கள் பின்னே நாட்டின் அவலம் வந்து மனதைத் தைத்துவிட்டால் மெளனமாக நகர்ந்து செல்லும் உறவுகள் என விமானநிலையப் பயணம் விதம் விதமாகும்.

'இனி எப்ப வருவீங்க மாமா' பாசத்துடன் கேட்கும் மருமகனுக்கு மாமா வரும் போது கொண்டு வரும் சொக்கோலாவின் சுவை இனிக்கும்!

'மாமா வரும் போது கணனி கொண்டு வரனும்'.

மருமகள் மாமாவிடம் தனக்கு என்ன தேவை என்பதை தெரிவிக்கும் இடம்! 'ஒழுங்கா சாப்பிடு தம்பி. நேரத்துக்கு உறங்கு, கண்ட படி இணையத்தில் உலாவத!' என்று குட்டுவதில் அக்காள் ஒரு ஆசிரியர் ஆவாள். ஆனால் 'அவன் என்ன சின்னப்பிள்ளையா கல்யாணம் முடிஞ்சுது! இன்னும் உனக்கு தம்பி பாசம்' என்று இடையில் தன் இருப்பை ஞாபகப் படுத்தும் மைத்துனர் உறவு. எல்லாம் தாண்டினால், 'ஏப்பா இப்ப போகத்தான் வேணுமா?' காதல் ஏக்கத்துடன் ஏங்கி நிற்பாள் எங்கோ பிறந்து பல ஊர்களில் அகதியாக அலைந்து எப்படியோ உறவுக்குள் கலியாணம் மூலம் வந்து குடும்பத்தில் இணைந்த கட்டின மனைவி...
தான் பிரியும் வேதனை கண்ணில் தெரிவதை அவள் பார்க்கக் கூடாது என்று சூரியகண்ணாடி போடும் கணவர் பலர் மெளனிப்பது இந்த விமாணநிலையப் பயணத்தில்.
'கண்டிப்பா விரைவில் வருவன்' என்று முகம் பார்க்கும் போதே முத்துக்களாக கண்ணீர்த்துளிகள் வந்துவிடும்!

'எனக்கு மட்டும் உன்னைப்பிரிந்து போக விருப்பமா? என்ன செய்வது உன் விசா கிடைத்தால் தான் உன்னைக்கூட்டிக் கொண்டு போகலாம்' என்று சொல்லும் போதே குற்றம் செய்தவன் போல துடிக்கும் கணவன்மார்கள் எண்ணிக்கொள்வது, ஏண்டா சாமி ஈழத்தில் தமிழனாகப் பிறந்து ஏதிலியாக ஐரோப்பாவிற்கு வந்தோம் என்று...!!

இத்தனை விடயங்கள் கடக்கும் போதே தம்பியும் சிறிலங்காவோ! 'காதுகேளாது போல... பாவம் செவிட்டு மிசின் பூட்டியிருக்கு.. ஆமிக்காரன் அடித்திருப்பாங்களோ!' அப்பாவியாக எண்ணும் பாட்டிக்குத் தெரியாது காதில் பாடல் ஒலிப்பது இந்த வயர் மூலம் என்று!

'என்னபாட்டி கேட்டீங்க?'

'அப்ப நல்லா காது கேட்கும்! நான் தப்பா நினைச்சுப் போட்டன் குறை நினையாதீங்கோ..'

'இல்ல பாட்டிநானும் அப்படியே தான் போறன்'.

'நல்லதாப் போச்சு!, நானும் சிங்கை வழி ஐரோப்பாவிற்குப் போய் அங்கிருந்து விட்டு கனடா போறன்'.

'என்ன செய்யனும்'.

'கையில் இருக்கும் படிவத்தை நிரப்பித் தந்துவிட்டு வாசல் கதவு வரை வந்தால் போதும்.
 இப்ப எல்லாம் அடிக்கடி மூச்சு வாங்குது! தம்பிக்கு கலியாணம் முடிஞ்சுதோ?
என்ர மகனுக்கும் உங்கட வயசு இருக்கும்.

 இன்னும் ஒன்றும் பொருந்தவில்லை!' என்று தாய் போல வந்துவிடும் தாயக உறவுகள் ஒருபுறம் என இந்தப்பயணங்கள் மனதைக் கனக்க வைக்கின்றது பல சமயங்களில்.
அப்போது ஒலிக்கும் குரல்..!
உங்கள் பயணத்திற்கான கதவு திறக்கப்படுகின்றது; பாதுகாப்புச் சோதனை தாண்டி உள்ளே சென்று அமரவும்.

அப்போது பாடல் கேட்பது இப்படியான..!